Выдавецтва “Янушкевіч” было адным з самых паспяховых у краіне, пакуль яго не знішчылі ўлады Беларусі. Спачатку Дэпартамент фінансавых расследаванняў Камітэту дзяржаўнага кантролю забраў тэхніку і заблакаваў банкаўскія рахункі. Пасля працаўнікоў папрасілі тэрмінова вызваліць офіс на Мар’еўскай вуліцы ў Мінску. Калі выдавецтва абвясціла распродаж кніг, чарга з пакупнікоў трымалася некалькі дзён.

Некаторыя кнігі выдавецтва былі прызнаныя дзяржаваю “экстрэмісцкімі”, а кнігарня “Кнігаўка”, якую “Янушкевіч” адкрыў у Мінску 16 траўня 2022 года, закрылася ў той жа дзень: спачатку туды прыйшлі беларускія прапагандысты, а пасля – сілавікі з ператрусам. Уладальніка выдавецтва Андрэя Янушкевіча разам з працаўніцаю кнігарні Настаю Карнацкаю затрымалі. Наста правяла ў зняволенні 23 дні, выдавец – 28.

Пасля вызвалення Андрэй Янушкевіч з’ехаў у Польшчу, дзе цяпер аднаўляе выдавецкую дзейнасць.

Каб зарганізаваць эфектыўную працу выдавецтва, трэба развязаць юрыдычныя пытанні, наладзіць лагістыку распаўсюду беларускіх кніг, сфармаваць новую каманду, сабраць чытачоў, якія сёння ў розных краінах. Развязанне гэтых задачаў у Беларусі заняло ў выдавецтва некалькі гадоў. Цяпер Андрэй Янушкевіч мусіць наладзіць працэс выдання беларускай кнігі наноў. Як выдавец ён добра вядомы беларускаму чытачу, а беларусам, якія апынуліся за мяжою, моцна не стае сваёй кнігі.

Супольна мы можам дапамагчы Андрэю Янушкевічу ды ягонай камандзе разгарнуць дзейнасць выдавецтва ў Польшчы як найхутчэй! З гэтаю мэтаю Беларуская Рада культуры збірае магістрат “Кнігаўка” – аб’яднанне ахвярадаўцаў, гатовых цягам акрэсленага тэрміну акрэсленаю сумаю падтрымліваць развіццё выдавецтва.